Toshkentda gastronomik va hunarmandchilik ko‘chalari paydo bo‘ladi

Toshkent shahrining sakkizta tumanida gastronomik va hunarmandchilik ko‘chalarini tashkil etish rejalashtirilgan. Bu haqda prezident ishtirokida poytaxtda sanoat, xizmat ko‘rsatish va infratuzilmani rivojlantirish masalalariga bag‘ishlangan yig‘ilishda ma’lum qilindi.

Investitsiya loyihalarini amalga oshirishni soddalashtirish maqsadida o‘tgan yili “Toshkent invest” kompaniyasi tashkil etildi. Bo‘sh turgan yer uchastkalari, davlat-xususiy sheriklik va obodonlashtirish loyihalari asosidagi loyihalarni amalga oshiradi.

Shu munosabat bilan poytaxtda DXSh doirasidagi loyihalarni amalga oshirishning soddalashtirilgan tartibi tasdiqlanadi, renovatsiya va “hayot davri shartnomasi” asosida hamkorlik qilinadi.

Toshkent shahrining Yangixayot tumanida sanoat salohiyatini oshirish va yuqori texnologiyalarga asoslangan yangi ishlab chiqarishni yo‘lga qo‘yish maqsadida 664,5 gektar maydonda “Yangi avlod” maxsus iqtisodiy zonasi tashkil etilib, unga 1,5 milliard dollar sarmoya kiritiladi. 2,5 mingta yangi ish oʻrni yaratilib, yiliga 1 trillion soʻmlik mahsulot ishlab chiqarish va 5 million dollarlik mahsulot eksport qilish imkonini beradi.

Xitoyning BYD, JACK va boshqa yirik kompaniyalari joylashtirishga qiziqish bildirishdi. Jami 800 ta korxona ishga tushirilishi rejalashtirilgan boʻlib, ularda 5 milliard dollarlik mahsulot ishlab chiqariladi va 100 ming kishi ish bilan taʼminlanadi.

Mirobod, Olmazor, Chilonzor, Uchtepa, Shayxontohur, Yunusobod, Yakkasaroy va Yashnobod tumanlarida gastronomik turizm va hunarmandlar ko‘chalari paydo bo‘ladi.

Bundan tashqari, poytaxt hududlarida savdo va xizmat ko‘rsatish ob’ektlari, mehmonxonalar, kanallar bo‘yida yashil va dam olish maskanlari barpo etiladi.

Prezidentimiz “Andijon tajribasi”dan keng foydalangan holda mahallalardagi o‘sish nuqtalarini aniqlash, ularni ayrim faoliyat turlariga ixtisoslashtirish va hududlarni obodonlashtirish bo‘yicha ko‘rsatmalar berdi.

Yangi gastronomik va hunarmand ko‘chalari poytaxtimizda turizmni rivojlantirishga xizmat qilishi kutilmoqda.

2-3 may kunlari O‘zbekiston poytaxtida uchinchi Toshkent xalqaro investitsiya forumi 2024 bo‘lib o‘tishi haqida avvalroq xabar berilgan edi. TMIF nafaqat O‘zbekiston, balki butun mintaqa uchun keng ko‘lamli tadbirlardan biridir.

Tadbir O‘zbekiston va Markaziy Osiyoning sarmoyaviy salohiyatini ochish maqsadida 2022-yildan buyon o‘tkazib kelinmoqda. Forum dasturidan yalpi majlis, shuningdek, qator muhokama uchrashuvlari, panel sessiyalari va davra suhbatlari o‘rin olgan.

Birinchi TMIF 2022 yil mart oyida bo’lib o’tdi va 56 mamlakatdan 2 mingdan ortiq mehmonni qabul qildi. Forum ishtirokchilari 7,8 milliard dollarlik shartnomalar imzoladi va 3,5 milliard dollarlik loyihalar bo‘yicha dastlabki kelishuvlarni rasmiylashtirdi.

TMIF-2023 ko‘rgazmasida qiymati 11 milliard dollarga teng bo‘lgan 164 ta investitsiya bitimi va shartnomalari imzolandi, ulardan eng yiriklari Xitoyning Gezhouba Investment va Turkiyaning Cengiz Enerji kompaniyalari bilan yangi elektr stansiyalarini qurish bo‘yicha kelishuvlardir. “Toshkent xalqaro investitsiya forumi-2024” yanada samarali bo‘lishi kutilmoqda.